विराटनगर, २०८१ चैत्र १०महिला हिंसा, दाइजो प्रथा र बालविवाहविरुद्ध जनचेतना फैलाउने उद्देश्यले विराटनगर महानगरपालिका वडा नं. १२, १३, र १५ का ३५ जना सहभागीलाई लक्षित गरी सचेतनामूलक तालिम सम्पन्न भएको छ।
श्री सयपत्री महिला सेवा केन्द्र, विराटनगर-११ को आयोजनामा तथा विराटनगर महानगरपालिकाको सहयोगमा सम्पन्न उक्त तालिममा प्रमुख अतिथिका रूपमा विराटनगर महानगरपालिका वडा नं. ११ का वडा अध्यक्ष तिर्थेन्द्र न्यौपाने उपस्थित थिए। कार्यक्रमको सभापतित्व सयपत्री महिला सेवा केन्द्रकी अध्यक्ष मञ्जु चापागाईंले गरिन्।
तालिमका प्रशिक्षक छाया राईले सहभागीहरूलाई महिला हिंसा, दाइजो प्रथा र बालविवाहको असर तथा त्यसविरुद्ध अपनाउन सकिने कानुनी तथा सामाजिक उपायहरूबारे प्रशिक्षण दिइन्। विशेष अतिथि भवानी शंकर चापागाईंले प्रशिक्षणलाई थप प्रभावकारी बनाउन महत्वपूर्ण सन्देश प्रदान गरे।
मिडियाकर्मी कमला कडेलले महिलाहरू हिंसाको शिकार हुने विभिन्न परम्परागत तथा सामाजिक कारणहरूबारे प्रकाश पार्दै, सचेतनाका माध्यमबाट हिंसाविरुद्ध लड्नुपर्ने आवश्यक रहेकाे उनकाे धारणा रहेकाे थियाे।
सयपत्री महिला सेवा केन्द्रकी अध्यक्ष मञ्जु चापागाईंले संस्था सामाजिक कार्यसँगै महिलाहरूका लागि सीपमूलक तालिम तथा गोष्ठीहरू सञ्चालन गर्दै आएको जानकारी दिइन्। कार्यक्रममा स्वागत मन्तव्य तारा गुरागाईंले दिएकी थिइन् भने कार्यक्रम सञ्चालन कविता निरौलाले गरेकी थिइन्।
महिला अधिकारको संरक्षण तथा हिंसा न्यूनिकरणका लागि यस्ता सचेतनामूलक कार्यक्रमहरू आवश्यक रहेको सहभागीहरूले बताएका छन्।